კიდევ ერთი დიდი გამარჯვება ჯო ენის საუნივერსიტეტო ჰოსპიტლის გულის თანდაყოლილი მანკების დეპარტამენტში! ბავშვთა კარდიოქირურგმა ომარ გოგიამ ძალიან დაბალი წონის პაციენტზე ფილტვის ვენების სრული ანომალიური დრენაჟის კორექცია ჩაატარა.
თანამედროვე მედიცინაში ფილტვის ვენების სრული ანომალიური დრენაჟის სუპრაკარდიალური ფორმის კორექცია არ წარმოადგენს დიდ სირთულეს, მაგრამ როდესაც ეს დიაგნოზი აქვს დღენაკლულ, 34 კვირის გესტაციის, 26 დღის და მხოლოდ 1800 გრამის წონის მქონე ბავშვს, ეს არის დიდი გამოწვევა ნებისმიერი გუნდისთვის მსოფლიოს ყველა სამედიცინო ცენტრში.
სამედიცინო ლიტერატურაში ამ წონის ბავშვზე ჩატარებული მსგავსი ოპერაციების მხოლოდ ერთეული შემთხვევებია აღწერილი, არსებულ სიას ჩვენი პაციენტიც დაემატა.
ოპერაციიდან მე-8 დღეს პაციენტი მოიხსნა ფილტვების ხელოვნური ვენტილაციიდან. ჯო ენის საუნივერსიტეტო ჰოსპიტლის ინტენსიური თერაპიის განყოფილებაში ის იმყოფებოდა 10 დღე. მისი დაბალი წონიდან გამომდინარე, მას ესაჭიროება ნეონატოლოგიური მეთვალყურეობა და ამიტომ გადაყვანილია სპეციალიზირებულ კლინიკაში.
ეს შემთხვევა კიდევ ერთხელ მეტყველებს იმას, თუ რამდენად მნიშვნელოვანია თითოეული რგოლის: ბავშვთა კარდიოლოგიის, კარდიოქირურგიის, ანესთეზიის, პერფუზიის და ინტენსიური თერაპიის სამსახურების ერთობლივი და შეთანხმებული მუშაობა.